Bräädieler Kerscheknöidel feiern

50. Jubiläumssitzung der Bräädieler Kerscheknöidel

Haldemol..., gut dass ich dich grad seh...
ich hab net viel Zeit, ich muss mich uff mei Jubiläum vorbereite....wie? Du weest net wass fore Jubiläum ? Ah soach emol - ich hab doch Fuffzichschdes - hot sich des no net rümgsproche?....also,- iiiich bin‘s doch, Dei Bräädieler Kerscheknöidelsitzung ! Ja, es iss wohr, ich bin scho fuchzich Johr oald !...also ich werd‘s erscht, nächschd Johr am 15.Februar...do iss dann die fuchzischde Sitzung - ich wees gornet, ob überhaupt ehner künnt zum graduliern. De Präsidend un die Midwirgende mache jetzt scho einen Stress...also mir net - ich gebb jo blouß mein Nome her....abba do werd scho gedanzd uff Deifel kumm raus unn die Büdderedna schreibe jetzt scho ihr Redd !! 2 Monad vorher !! ...mei Padeonkels, die zwee Winni‘s häbbe als no 5 Minudde vorem Ufftritt an ihra Redd g‘schriebe. Naja, es iss hald eh schnelllebiche Zeit worn..... ohh, ich wees es noch, wie alles ohgfange hot, die häbbe jo für miich am Ofang net emol ehn Soal g‘had, - noch Rüddnau senn se mit mir naus... des wor abba nix richdiches, zu klee unn des mit dene Plätz für mei Besucher hot ohr ned sou richtich hieghaud...des heeßt- hieghaud häbbe einiche scho. Ich hab dann druff bestanne, das des annerschd wern muss. Sie häbbes ei‘gsehe unn senn dann noch Kleehebboch in de Schöine Aussicht‘s Soal - der wor zwor net sou schöi, aber schöi wors ! Do bin ich eichendlich uffgewachse. Des iss jedes Johr schönner worn - un die ganze Blödel no blöder! Mei ganze Besucher häbbe als gelacht un geschungelt, das ball der ganze Soal nabzamme gebroche iss. Wenn ich als dro denk, was die alles trackdiert häbbe, das ich eh schöini Sitzung werd unn was alles dodebei passierd iss, ich lach mich heud no freckt. Wissd Ihr no, wie der Öiloufe exblodierd iss un die weiße Kiddel von de Kleehebbocha Abordnung schwaz gsprengeld worn ? Odda wie es Erikasche mit de grouß Schaugel quasi dorch die Wänn uff die Bühne gedunnerd iss? Liebi Zeit, was häbbe die Leud gekrische. Am meischde freed mich jo, das fuffzich Joar lang fascht nur Bräädieler mei Sitzung gestalded häbbe und dass bis heuid die Juchend sou klasse mietmeechd un die Tradition houchhäld. Reschbeggd !! Noch eh boor Joahrn, wie dann der Soal ruinierd wor, unn die Werdsleuid mid de Nerve ferdich ( hab ebe eh bissle übatriebe! ) senn se mit mir dann in den schöine Hofgaddesoal ümgezoche. Do häbbe se hald kee Nächel mehr in de Bode haue dörfe odda die Aussewänn dorchbohrn um ehn Gecheanker zu verschraube, das se souzusache inne an eh Stahlseil zendnerschweri Kullisse hihänge gekönnt häbbe. Abb ich muss Euich sache, es iss sensationell weidergange. Alle Midwirgende, die jedesjoar für mich Stunde an Freizeit und Ärbet opfan, die sich finanziell neihänge unn Zeuich koafe odda Geld unn Sache sponsern, möchd ich hier emol herzlich danke soache ! Der Juchend möchd ich emol soache, kommt, macht mit, Gaudi, Spass unn Fröhlichkeit braucht der Mensch !
Unn meine Besucher wolld ich soache - die Midwirgende uff de Bühne strenge sich oh, Euch zu unnerhalde un zum Lache zu bringe - unn für ehn Redner oder Darsteller gibds nix schlimmeres, als wenns im Soal laut iss un keener vosteht den Gäg. Gebbt denne uff meiner Bühne eh Schoase unn unnerstüzt die, wenns denne keen Spass mer meecht, meecht ball keener mehr was....ich wolld Euich ganz was anneres soache...was wor dann des ?
Achsou...wer Kadde für mei Sitzung am 15. Februar 2025 will, der muss am 11. Januar 2025 schnell sein, do wern die in de oalde Schul verkoafd !! Unn no ebbs ! Am 03.03. 2025 lääft widder der Bräädieler Strooßefasching - mid odda ohne Masgge, besser iss mid...abba ohne...
du liebi Zeit....Euier Bräädieler Kerscheknööidelsitzung !
Winfried Swetlik im Auftrag der Sitzung