Einheimische und Zweiheimische babbele beim Heimat- und Geschichtsverein Kleinwallstadt e.V.

Blous nid weider vezähle odder doch?

Wenn der`s lese kennd, dann derf ders verrode, was mer gemachd hewwe.
Heija jei! Es ging ganz scheh her im Ånstalds-Caffee am Dienstag. Von de Straa-ebbel-beem uff unserne Ägger, Boam-steiwer, Schill-hooge, Ebbel-sagg, Sagg-bennel, Ebbel-moanne, zum Siess-most bis Ebbel-bloaz un onnern gurre Sache von unserne Gesund-bleib-middel, is alles be-redd worn. Dass mer sou viel Ü90 Leid bei uns hewwe, die Geschicht`schen vezähle kenne, leid bestimmd a do drou. Des trinke vom Most hod a oft die Folsche gehod, dass mer blümerand worn is. Do hods dann iwweroal no-och gewwe misse, owwe un unne. Jedenfalls hods gesche Hardleibischkeid geholfe.
Månsches is a vom Moa vezähld worn, wås bis heid koaner wisse derf: Wie die neie Schuh von de Welle mitgenumme worn sån. Ewwer a, wie en Buh uff em zugefrorene Moa uff ner abgebrochene Eisscholle bis zum Gerhards Stoabruch abgedriewe is, dort ewwer goddseidank in de Neh vom Ufer abspringe hod kenne, un bitsch nass homlaafe mussd, mit de steif gefrorene Hose. Bis heid hod em noch viel gebliehd: Kriesch, Gefångenschafd un noch månsches Ånnere. Alles iwwerlebbd, sons werrer jo heid nid do un boul 98 Johr old.
Was ånneres derf mer nid schreiwe: nämlisch, dass die hiesische Bank a de Weesch frei meschd, wenns Briggelsche mol vestobbd is. Sou is des alles bei uns rischdisch gereescheld.
Uff oumol is a de Bembelhoiner kumme. Der wor jo lusdisch un hod gesunge. Isch glaab, dem hods a bei uns gefalle. Un viele Schulmädschen worn do, die die Ohr`n gespitzt hewwe, a ihr Pabier wor zum Schluss vull geschriewe. Die hewwe mansches neies erforn, was se in de Schul nid lerne. Wås sån Sunnefischel, Petzeme, Breschebbel, Derrebbel, Grotze, Ebbel stobbeln un noch ånneres? A dass fischeloand es Geschedaal von schinoand is. Jezd wisse mers. Es Dialektsche hod a von de Brenke aus zugehorschd un hod gour nid geflennd, obwohl mer fasd zum Schluss noch Krach grieschd hewwe. Was is dann die Wohredd? Woher kimmd des, dass die Grousswellschder zu uns Bollagge soche und mir zu Denne? Es hod sou viel Variande gewwe, dass mer nimmer wussde, was mer glaawe soll.
Boal woars scho werre zeirisch un es is a scho femelisch worn. A oune Ebbelwoi hemmer dudzendfach Spass gehåod, nid nur die Einheimische a die viele Zweiheimische.
Åm 27.November doun mer in de Zehndscheiern weirer Babbele!